Kynning á leikjahönnunar áföngum

February 2, 2017 by systur

Í seinustu viku héldum við fræðsluhádegi þar sem David Thue og Joon Van Hove komu og kynntu áfangana Game Design & Development og Advanced Game Design & Development.
David hafði samband við okkur um daginn vegna þess hve fáar stelpur hafa verið að skrá sig í áfangann Game Design & Development. Við ákváðum því að fá þá félaga til þess að halda kynningu á áfanganum og fengum Steinunni Mörtu Friðriksdóttur tölvunarfræðing til þess að koma og ræða um sína reynslu af áfanganum.

Í áfanganum sem spannar 3 vikur er farið í gegnum ferlið að búa til leik. Nemendur byrja á því að fara í gegnum sköpunarferlið þar sem hugmyndum er kastað fram og unnið með þær. Eftir hugmynda- og hönnunarvinnuna er hafist handa við sjálfa forritun á þeirri hugmynd sem stóð upp úr.

David lagði áherslu á að það helsta sem hann vill að nemendur taki með sér úr áfanganum sé að æfa sig í að setja sér raunhæf markmið og að taka við uppbyggjandi gagnrýni frá fólki ,,úr bransanum”. Þannig sé ekki markmið að þjálfa einhvert sérstakt skill heldur að læra grunninn og þjálfa sig í að læra hratt.

Áfanginn þjálfar rökhugsun – hvernig er best að leysa vandamál, hvernig eru leikir byggðir upp og hvernig er best að greina þá. Einnig koma reynslumiklir gestafyrirlesarar sem geta veitt innsýn inn í heim tölvuleikjanna.

~~~~~~

Næst kom Steinunn Marta og fjallaði um sína reynslu af áfanganum. Steinunn er nýútskrifaður tölvunarfræðingur frá HR og hafði margt gott að segja um áfangann – hún sagði hann vera þann skemmtilegasta sem hún tók í náminu.

Hún sagði ekki nauðsynlegt að hafa spilað tölvuleiki til þess að skrá sig í áfangann. Að lokum hvatti hún stelpurnar til að vera ekki að stressa sig á því að kunna ekki nógu mikið að forrita – þær kunni yfirleitt meira en þær halda. Auk þess snýr áfanginn ekki bara að forritun heldur eru fleiri þættir sem snúa að leikjahönnun.

Leikurinn sem Steinunni gerði á sínum tíma í áfanganum er hér.

~~~~~~

Joon Van Hove endaði á að kynna framhaldsáfanga Game Design & Development – Andvanced Game Design & Development. Þó áfanginn sé framhald af fyrrnefndum áfanga gera þeir undantekningar frá forkröfum ef þeir telja nemendur hafa nægan grunn, t.d. að hafa setið áfangann Tölvugrafík.

~~~~~~

Fyrir fyrirlesturinn höfðu einungis 5 stelpur setið áfangann en eftir því sem við best vitum eru 9 stelpur skráðar í hann í vor. Fyrirlesturinn hefur því skilað meira en 100% aukningu og því ber að fagna!

Berglind Ósk

January 9, 2017 by systur

Berglind Ósk Bergsdóttir er einn reyndasti android forritari landsins. Hún hélt fyrirlestur í fyrirlestrahádegi /sys/tra á seinustu önn um greinina ,,Feeling like a fake – the impostor syndrome” (hér). Berglind vinnur við hugbúnaðarþróun hjá Kolibri sem framendaforritari.

Við fengum hana til þess að svara nokkrum spurningum um sjálfa sig.

Berglind Ósk útskrifaðist með BSc í tölvunarfræði frá Háskóla Íslands vorið 2010. BSc verkefnið hennar snéri að forritun fyrir tölvutengdan þreifistaf fyrir blinda. Þegar notandinn hreyfir þreifistafinn er eins og hann þreifi á yfirborði einhvers hlutar, t.d. kúlu eða ferils. Þetta getur m.a. gagnast í stærðfræðikennslu fyrir blinda sem geta fundið hvernig föll líta út og fleira.

Varðandi námið segir hún að gagnlegustu áfangarnir hafi verið hugbúnaðarverkefni 1 & 2, forritunarmál, tölvugrafík, vefforritun og grunnáfangarnir tölvunarfræði 1 & 2.

Þegar hún er spurð um ráð fyrir núverandi nemendur segir hún:

Að læra í hóp og ekki vera hrædd við að spyrja samnemendur og kennara þegar þið skiljið eitthvað ekki. Endilega takið þátt í félagslífinu og hafið gaman. Einkunnir skipta þannig séð engu máli (það leit aldrei neinn vinnustaður á einkunnirnar mínar úr háskólanáminu), heldur skiptir reynsla miklu meira máli – hvort sem það er sumarvinna eða forrit sem þið hafið sjálf hafið gert í frítíma ykkar. Þannig lærum við líka mest, með því að forrita.

Innan tölvunarfræðinnar þykir henni mobile- og framendaforritun skemmtilegust, en líka bara að fá að forrita.

Þegar hún er ekki að forrita finnst henni gaman að semja og flytja ljóð og raftónlist, lesa, spila borðspil, ferðast, fara á tónleika, iðka jóga og sund.

,,Greinin þín ,,Feeling like a fake – Impostor syndrome” var mjög áhugaverð og við tengdum mikið við hana. Hefurðu ráð fyrir þá sem þjást af þessum einkennum”:

Að hafa það í huga að þið eruð ekki ein um að þjást af þessu. Eru væntingarnar sem þið hafið til sjálfra ykkar kannski óraunhæfar og eingöngu frá ykkur komið? Talið við félaga um hvernig ykkur líður og fáið feedback. Farið og verið óhrædd við að spyrja. Munið að það er enginn fullkominn, það er í lagi að gera mistök og þið eruð ykkar verstu dómarar!

,,Hverjar eru helstu fyrirmyndir þínar og hvers vegna”:

Úff, það eru svo margar! Listakonan Amanda Palmer fyrir að vera hún sjálf – algjörlega opin og deilir opinberlega sínum tilfinningum og hugsunum. Brooke McAlary sem er með podcastið Slow Home sem hefur gjörbreytt lífi mínu til hins betra seinasta árið og svo Bob Dylan fyrir innblástur í ljóðagerð og tónlist og að vera hann sjálfur sama hvað. Hjá Kolibri hef ég unnið með og vinn með mörgu hæfileikaríku og góðhjörtuðu fólki sem eru mér mikilvægar fyrirmyndir. Auk þess að vera svo heppin að eiga ótrúlega flottar vinkonur sem eru mér líka stöðugar fyrirmyndir.

,,Er einhver kona í atvinnulífinu sem þú lítur upp til? Hvers vegna?”:

Magga Dóra, UX-hönnuður og tölvunarfræðingur sem starfar nú hjá MadPow. Magga Dóra var partur af Tæknitátum, sem var hópur kvenna í tæknigeiranum sem hittist öðru hverju á meðan ég var í námi og þessir hittingar voru mér mikilvægir til að sjá kvenfyrirmyndir. Svo er Kolbrún Halldórsdóttir tölvunarfræðingur og verkefnastjóri tæknideildar 365, sem ég var svo heppin að fá að vinna með hjá gogoyoko – fyrsta vinnustaðnum mínum eftir útskrift. Hún sýndi mér að það er ekkert mál að vera kona í þessum geira og var mér ómetanlegur stuðningur á þessum fyrstu skrefum á vinnumarkaðinum. Að lokum vil ég minnast á Birgittu Jónsdóttur skáld og þingkonu, en mér hefur auðnast að starfa með henni að IMMI og með Pírötum. Hún er hörkudugleg og sterk kona sem vill bæta heiminn og er óhrædd við að standa með sinni samvisku og láta til sín heyra.

,,Hvernig finnst þér staða kvenna í tæknigeiranum?”:

Auðvitað er leiðinlegt hvað konur eru ennþá í miklum minnihluta, en það er sem betur fer að breytast og hefur breyst töluvert síðan ég útskrifaðist. Persónulega hef ég nánast ekkert fundið fyrir neinum fordómum, né upplifað neitt misrétti sem kona í þessum geira á Íslandi sem er auðvitað bara frábært.

,,Að lokum, er eitthvað annað sem þú vilt koma á framfæri?”:

Þótt mér finnist forritun sjálf ótrúlega skemmtileg þá skiptir ekki minna máli að vera í góðu teymi og vera á stað með góðum anda þar sem fólk fær að vera það sjálft og þroskast sem bæði forritarar og manneskjur. Ég mæli með Agile aðferðum við hugbúnaðarþróun sem er ótrúlega gagnlegar til að fá það besta úr teymum og hvet fólk til að kafa dýpta í hvernig er best að vinna með öðrum, þar má nefna the Core Protocols og Reinventing organisations.

Jóhanna María, formaður Tvíundar

September 27, 2016 by systur

Jóhanna María Svövudóttir er formaður Tvíundar (nemendafélag tölvunarfræðideildar HR). Hún er 24 ára annars árs nemi við tölvunarfræðideild HR – sannkölluð ofurkona.

Hún hafði enga reynslu af tölvunarfræði áður en hún byrjaði en það hefur ekki komið að sök enda hörkunemandi á forsetalista HR. Innan tölvunarfræðinnar finnst henni öll forritun skemmtileg en utan skóla finnst henni gaman að fara í ræktina, ferðast og læra eitthvað aukalega [innsk. höf.: þvílíkur metnaður!].

Hvers vegna tölvunarfræði: Ég valdi tölvunarfræði upphaflega vegna þess að þar bíða manns góðir tekju- og atvinnumöguleikar að lokinni útskrift.

Hver eru framtíðaráform þín: Draumurinn er að fá skemmtilega vinnu á skemmtilegum vinnustað. Svo langar mig líka að ferðast meira.

Hvernig finnst þér staða kvenna í tæknigeiranum: Mér finnst hún fara batnandi með hverju árinu, en eins og er vil ég sjá töluvert fleiri stelpur í þessum geira.

Er eitthvað sem hefur komið þér á óvart við tölvunarfræðina: Það kom mér verulega á óvart hversu skemmtileg mér fannst hún.

Að lokum spyr ég hvort hún hafi góð ráð fyrir stelpur sem eru að byrja í tölvunarfræði eða hafa áhuga á tölvunarfræði.

„Ekki láta blekkjast af staðalímyndum tölvunarfræðinnar, þetta 
fag er alveg jafn mikið fyrir klárar stelpur sem hafa enga reynslu 
og stráka sem hafa leikið sér að því að hakka frá því þeir voru 10 ára.“

Sólveig Sara – nýnemafulltrúi /sys/tra 2016-2017

September 22, 2016 by systur

Sólveig Sara Samúelsdóttir er 26 ára tölvunarfræðinemi við Háskólann í Reykjavík og nýnemafulltrúi /sys/tra 2016 – 2017.

Sólveig er útskrifaður viðskiptafræðingur (einnig frá HR) auk þess sem hún lærði snyrtifræði og förðunarfræði í Danmörku. Utan skóla finnst henni skemmtilegast að vera með vinum og fjölskyldu, borða góðan mat auk þess sem hún æfir frjálsar íþróttir og CrossFit.

Hvers vegna tölvunarfræði: Tölvunarfræði er áhugavert nám sem gefur góða atvinnumöguleika og mörg tækifæri. Námið tengist einnig viðskiptafræðináminu að nokkru leyti.

Hefur þú einhverja reynslu af tölvunarfræði fyrir nám: Nei, enga fyrri reynslu nema almenna tölvukunnáttu.

Þegar Sólveig er spurð um hverjar fyrirmyndir hennar eru segist hún ekki eiga neinar ákveðnar fyrirmyndir en hún reyni að tileinka sér það jákvæða sem hún sér í fari hvers og eins.

Ég vil vera besta útgáfan af sjálfri mér á hverjum einasta degi.

Þegar hún er spurð um kvenfyrirmyndir í atvinnulífinu dettur henni Vigdís Finnbogadóttir fyrst í hug. Hún sé kona sem lætur ekkert stöðva sig.

Hvernig finnst þér staða kvenna í tölvunarfræði: Ég held að það sé skortur á kvenmönnum í tölvunarfræði. Það mætti hvetja fleiri til að sækja námið með því að kynna námið meira. Það má alltaf gera gott enn betra.

/sys/tur er því mjög gagnlegt félag til að efla kvenmenn innan tölvunarfræðinnar.

Er eitthvað sem hefur komið þér á óvart við tölvunarfræðina: Hvað þetta er skemmtilegt nám og hvað ég er búin að læra margt á stuttum tíma.

Við /sys/tur erum mjög ánægðar að fá þessa ofurkonu með okkur í lið!

Opnunarkvöld /sys/tra 2016

September 13, 2016 by systur

Við heldum opnunarkvöld /sys/tra fimmtudaginn 1. september sl. á höfninni við Hörpu. Það var góð mæting og frábær stemmning.

Markmiðið var að kynna starf /sys/tra, koma saman og kynnast og hafa gaman. Það var gaman að sjá hversu margir nýnemar létu sjá sig, bæði stelpur og strákar.

Við vorum sérstaklega ánægðar með það að sjá eldri stjórnarmeðlimi mæta á svæðið! Gaman að sjá ykkur Ingibjörg (hér), Anna, Sara og Hafdís!

Við minnum svo á hugmyndakassann okkar. Við erum alltaf opnar fyrir hugmyndum!

Margrét S. Kristjánsdóttir

August 30, 2016 by systur

Margrét er ein af upphaflegum /sys/trum. Hún er með BSc í tölvunarfræði frá HR og vinnur núna hjá Advania. Hún æfir Brasilískt Jiu-Jitsu hjá Mjölni.

~ ~ ~

Nafn: Margrét S. Kristjánsdóttir, aðstoðaði stofnendur /sys/tra í upphafi og sat svo síðar sem varamaður í stjórn.

Aldur: 30 ára

Útskrift: BSc í tölvunarfræði í janúar 2015

Hvar vinnurðu (og við hvað): Ég vinn hjá Advania og hef gert það síðan ég útskrifaðist. Ég er hluti af SharePoint hópi og starfa þar sem ráðgjafi og almennur forritari.

BSc verkefni: CESAR (Centris Schedule Automation bRidge), forrit sem sækir gögn um áfanga, stofur og kennara innan Háskólans í Reykjavík og þáttar (parses) gögnin yfir á .xml eða .csv format. Þessum skrám má svo hlaða inn í forrit frá þriðja aðila sem sér um að búa til stundatöflur út frá gögnunum. Þegar stundatöflurnar eru tilbúnar er þeim hlaðið inn í CESAR á xml/scv formati og CESAR keyrður aftur. CESAR les tímatöfluna, þáttar hana og pantar stofur úr gagnagrunni skólans.

Hvað finnst þér skemmtilegast innan tölvunarfræðinnar: Mér finnst skemmtilegast að vinna í framenda hluta vefa og annarra umhverfa. Ég vil helst sjá hlutina gerast – sjá breytingar myndrænt. Annars heillar flest forritun mig.

Hvað finnst þér gaman að gera utan tölvunarfræðinnar: Ég hef gaman af því að eyða miklum tíma með kærastanum mínum og hundinum okkar. Annars æfi ég einnig BJJ í Mjölni ásamt öðru skemmtilegu þar. Áður fyrr æfði ég bogfimi og á boga – er alltaf að reyna að koma mér af stað í það aftur.

Hvernig telur þú að námið í HR hafi nýst þér í undirbúningi fyrir vinnuna: Það nýtist auðvitað mjög vel. Öll praktísku verkefnin í Tölvunarfræðinni í HR undirbúa mann vel fyrir vinnumarkaðinn. Námið kennir manni ákveðna rökhugsun í þessum geira og gerir mann betur í stakk búinn til að leysa ýmis forritunarvandamál. Þar sem ég hafði aldrei forritað áður en ég fór í þetta nám, þá augljóslega hefur það nýst mér mjög vel. Einnig fær maður alveg nýja sín á Google 🙂

Hverjar eru helstu fyrirmyndir þínar og hvers vegna: Ada Lovelace finnst mér vera flott fyrirmynd, enda var hún þekkt fyrir að vera fyrsti forritarinn því hún skrifaði reiknirit á reiknivél Charles Babbage. Hefði reiknivélin verið smíðuð hefði forritið hennar látið vélina reikna út röð Bernoulli talna. Hún hefur vegna þess verið kölluð fyrsti forritarinn og forritunarmál verið nefnt eftir henni. Hversu töff er það 🙂

Er einhver kona í atvinnulífinu sem þú lítur upp til? Hvers vegna? Mér finnst Berglind Ósk Bergsdóttir hjá Kolibri, og áður Plain Vanilla, vera hreint út sagt frábær. Hef séð hana bæði halda fyrirlestur á /sys/tra fyrirlestrakvöldi þar sem hún kynnti android forritun og núna nýlega sá ég hana á JSConf meetup þar sem hún talaði um fyrirbærið „Impostor syndrome – feeling lika a fake“, [sjá hér] ég tengdi svo rosalega vel við það sem hún sagði þar. Hún er flottur forritari sem ég lít upp til.

Hvernig finnst þér staða kvenna í tæknigeiranum: Staðan finnst mér vera á uppleið, en mjög hægri uppleið. Hún er alls ekki góð og ekki þar sem við viljum hafa hana. Starf /sys/tra er til að mynda mjög mikilvægt hér á Íslandi. Ef haldið er áfram að ná til stúlkna yngri kynslóða og kvenna almennt, þá munum við halda áfram að sjá breytingar.

Hverjir voru gagnlegustu áfangarnir sem þú tókst: Hugsa að það hafi verið Vefforritun I og II og svo Vefþjónustur. Þessir áfangar voru líka uppáhalds áfangarnir mínir. Þeir hafa nýst mér vel í starfi, þá sér í lagi þegar ég fæ framendavinnu inn á borð hjá mér.

Hvað hefðirðu viljað kynna þér betur: Ég hefði mögulega viljað fara alla leið með Vefforritunarleiðina í náminu. Ég kláraði önn fyrr þar sem hafði 60 [einingar] úr fyrra háskólanámi metnar. Hefði ég ákveðið að vera önn lengur hefði ég tekið aðeins fleiri áfanga sem tengjast vefforritun og hönnun vefa. Einnig hefði ég viljað kynna mér betur snjallsímaforritun. En ég sé ekki eftir neinu í náminu, það er ekkert mál að kynnast öllu því sem maður vill læra aukalega á netinu ef út í það er farið.

Hver eru þín framtíðaráhorf: Mín framtíðaráhorf eru að vinna sem framenda-/vefforritari. Halda áfram að læra og hafa gaman að því að forrita.

Hefur þú einhver góð ráð fyrir núverandi nemendur í tölvunarfræði við HR: Ég veit að þetta getur verið erfitt en ekki gefast upp, þetta nám er 100% þess virði. Þú sérð ekki eftir þessu námi þegar þú ert komin á vinnumarkaðinn. Skemmtileg vinna og skemmtilegt og fjölbreytt fólk. En alls ekki gleyma ykkur í bókunum, ég mæli með að skella sér í vísindaferði og kynnast fyrirtækjunum á þessum markaði. Þá fáið þið líka smá nasaþef af því hvernig vinnu þið getið unnið við eftir nám.

Annað sem þú vilt koma á framfæri: Njótið þessara skemmtilegu ára í þessu námi. Verið dugleg að fikta ykkur áfram í því sem þið gerið, öll auka verkefni sem þið takið ykkur fyrir hendur hjálpa þegar kemur að atvinnuleit eftir nám 🙂

Ingibjörg Ósk, mastersnemi við HR

August 19, 2016 by systur 1 Comment

Nýr spennandi liður sem við kynnum eru viðtöl við flottar stelpur í tæknigeiranum. Sú sem ríður á vaðið er Ingibjörg Ósk Jónsdóttir, ein af stofnendum /sys/tra.

~~~~~~

Nafn: Ingibjörg Ósk Jónsdóttir, ein af stofnendum /sys/tra & fyrrum formaður.

Aldur: 24 ára.

Útskrift: BSc í hugbúnaðarverkfræði árið 2015.

Hvað finnsts þér skemmtilegast innan tölvunarfræðinnar: Það skemmtilegasta sem ég geri er að forrita og þá aðallega í framendanum. App forritun á hug minn allan en gervigreind kallar líka sterkt á mig.

Hvað finnst þér gaman að gera utan tölvunarfræðinnar: Ég elska að ferðast og eyða tíma með hundinum mínum í náttúrunni.

Hvar vinnurðu (og við hvað): Ég vinn við mobile app forritun hjá Gangverki og er núna að forrita iOS appið Sotheby’s. Þar að auki er ég í mastersnámi í hugbúnaðarverkfræði.

Hvernig telur þú að námið í HR hafi nýst þér í undirbúningi fyrir vinnuna: Það sem nýtist mér helst úr HR var endalaus verkefnavinna í kúrsum tölvunarfræðinnar. Af henni græddi ég lausnarmiðaða hugsun, betri rökhugsun, æfingu í hópavinnu og Google hæfileika 🙂

Hverjar eru helstu fyrirmyndir þínar og hvers vegna: Grace Hopper er klárlega stærsta fyrirmynd mín. Það er ekki bara vegna þess að hún þróaði fyrsta þýðandann heldur er það vegna húmors hennar og viðhorfs. Tilvitnunin hér að neðan segir allt sem segja þarf:

If it’s a good idea, go ahead and do it. It’s much easier to apologize than it is to get permission

Humans are allergic to change. They love to say, “We’ve always done it this way.” I try to fight that. That’s why I have a clock on my wall that runs counterclockwise.

Þar að auki eru yfirmenn mínir hjá Gangverki miklar fyrirmyndir mínar. Þeir eru hörkuforritarar sem ég hef lært mikið af og snillingar í samskiptum við viðskiptavini.

Hvaða konu í atvinnulífinu líturðu upp til: Berglind Ósk Bergsdóttir hjá Kolibri. Hún var einn fyrsti Android forritarinn á Íslandi og á ferli sínum hefur hún súnt að hún er samkvæm sjálfri sér og hugrökk. Ég verð líka að nefna Svönu Helen Björnsdóttur, rafmagnsverkfræðing og frumkvöðul. Hún hélt fyrirlestur á /sys/tra kvöldi fyrir nokkrum árum og veitti mér mikinn innblástur.

Hvernig finnst þér staða kvenna í tæknigeiranum: Hún er ekki nógu góð en staðan almennt er heldur ekki nógu góð. Það er fullt af fólki þarna úti sem fer á mis við forritun. Í þeim hópi eru stelpur í meirihluta. Það segir sig sjálft því þær eru einungis um 20-25% í tæknigeiranum öllum. Stelpur eiga alveg jafnmikið erindi inn í tæknigeirann eins og strákar. Hlutfall kvenna í tölvunarfræðideild HR hefur aukist mikið á undanförnum 3 árum og ég held að /sys/tur hafi átt stóran þátt í því. Ég hef því engar áhyggjur af framtíðinni og held að þetta muni fljótt jafnast út með hjálp flottra samtaka eins og /sys/tra.

Hverjir voru gagnlegustu áfangarnir sem þú tókst: Inngangur að tölvunarfræði, Forritun, Vefforritun og Þýðendur.

Hvað hefðirðu viljað kynna þér betur: Mobile app forritun og gervigreind.

Hver eru þín framtíðaráhorf: Framtíðaráhorf mín eru að verða betri með hverjum deginum í að forrita og læra nýja hluti.

Hefur þú einhver góð ráð fyrir núverandi nemendur í tölvunarfræði við HR: Takið virkan þátt í félagslífinu. Það er svo hollt fyrir sálina að kíkja út endrum og sinnum þótt þið viljið bara vera heima að forrita. Sækið um stöður sem aðstoðarkennarar – jafnvel þótt ykkur finnist þið ekki vera snillingur í kúrsinum því þið lærið svo mikið á því að þurfa að kenna öðrum.

Annað sem þú vilt koma á framfæri: Reynið eins og þið getið að fá sumarvinnu tengda náminu eða finnið starfsnám erlendis. Ef það tekst ekki, þá getið þið fundið ykkur gæluverkefni til að vinna í á sumrin. Það er svo dýrmæt reynsla sem nýtist ykkur eftir útskrift.

Nýtt skólaár 2016 – 2017

August 16, 2016 by systur

Þá er sumarið að líða undir lok og nýtt og ferskt skólaár að hefjast. Ný stjórn /sys/tra hlakkast á að takast á við ný verkefni. Við ætlum að vera duglegar að leyfa ykkur að fylgjast með hér á síðuni.

Í dag er nýnemadagur og við bjóðum alla nýnema velkomna í HR!

Aðalfundur /sys/tra

May 3, 2016 by systur

Aðalfundur /sys/tra var haldinn í dag, 3. maí. Þar fórum við yfir það sem við gerðum á liðnu námsári, ársreikning, lagabreytingar og kosið í nýja stjórn /sys/tra. Samþykktrar voru nýjar lagabreytingar þar sem breytt var embættaskipan stjórn sys/tra. Áður var stjórn félagsins skipuð fimm félagsmönnum; formanni, varaformanni, gjaldkera, ritar, upplýsingarfulltrúa og þremur varamönnum. Lagabreytingin var sú að embættin yrðu; formaður, varaformaður, ritari, gjaldkeri, fjölmiðlafulltrúi, viðburðastjóri og nýnemafulltrúi. Einnig var ennfremur skilgreint hlutverk hvers og eins stjórnarmeðlims.

Kosið var í nýja stjórn. Kosið var eitt embætti í einu þar sem stelpur buðu sig fram í tiltekið embætti. Nýja stjórnin samanstendur af:

Formaður: Katrín Mjöll Halldórsdóttir

Varaformaður: Þórhildur Þorleiksdóttir

Ritari: Hanna Ragnarsdóttir

Gjaldkeri: Ásthildur Guðmundsdóttir

Fjölmiðlafulltrúi: Ásta Ægisdóttir

Viðburðarstjóri: Hulda Lilja Hannesdóttir

Kosið verður um nýnemafulltrúa þegar næsta önn byrjar.

Fráfarandi stjórn /sys/tra býður nýju stjórninni velkomna og hlakkar til að fylgjast með.

Stelpur og Tækni

May 3, 2016 by systur

Stelpur og tækni dagurinn var haldinn í þriðja sinn 28.apríl í tilefni “Girls in ICT Day”. Um 400 stelpur komu í HR og tókum við /sys/tur að okkur 150 stelpur í workshop, þar sem þær fengu að spreyta sig í HTML og CSS. Við skemmtum okkur mjög vel og það var gaman að sjá hvað margar voru áhugasamar um efnið.